بام شُبین ھسابجّار ءِ نوکتریں گِدار کیھر نثاریوسف ۔ بلوچی مراگش الإمارات العربية المتحدة

ھسا بجّار ءِ نوکتریں گِدار کیھر ءِ سرا کسانیں چمشانکے ۔ نثاریوسف ھسا بجّار بلوچی لبزانک ءِ پڑ ءٙ شاعر ، آزمانکار ءُ گِدارنویسے ءِ جہت ءٙ زانگ بیت ، آ ماں غلام محمد ولیج کوھنیں گولیمار کراچی ءٙ واجہ بجّار ءِ لوگ ءٙ ودی بیتگ ۔ وتی بِنداتی وانگ ے چہ مڈل سکول چُربک ءٙ دربُرتگ ءُ مڈل ءُ میٹرکے ہائی سکول بل نگور ءٙ ونتگ اٙنت ، لبزانک ءِ پِڑ ءٙ نود ءِ دھکّ ءٙ وتی گام ے ایر کتگ اٙنت ، ہما وھد ءٙ کہ ہشتمی جماعت ءٙ وانگ ءٙ بیتگ ، آئی ءٙ وتی لبزانکی سفر ءِ بِندات چہ شعر ءُ شاعری ءٙ کتگ ، بلئے پدا چیزے وھد ءٙ ءُ رند ڈاکٹر ناگمان بلوچ ءِ سوج ءُ صلاہانی سبب ءٙ ردانک ءِ نیمگ ءٙ اتکگ ءُ داں اے وھد ءٙ گوں ہمے کاروان ءِ ہمراہی ءٙ ، سفرے برجاہ اِنت ۔ ھسا بجّار ءٙ وتی جتائیں درشانداب ءُ ساچشتی توان ءِ سبب ءٙ ماں ردانک ءِ دُنیا ءٙ سکّیں کمیں مُدّتے ءٙ پہ وت ءٙ ہنچیں جاہ ءُ مکامے گپتگ کہ باز کم نبشتہ کار ءٙ نصیب بیت ، آئی ءِ ردانک نویسی ءِ مستری اِزم ءُ ھنر ہمیش اِنت کہ آ وتی وانوک ءٙ ہچ جاگہ ابیتک ءُ تہنا ء نہ کنت ، پمشکہ وانوک آئی ءِ ہمراہی ءٙ ہچ وڈ ءٙ تکانسر نہ بیت ، ہمے سبب اِنت کہ وانوک ءٙ آ دوست بیت ءُ آئی ءٙ پہ ھُب ءُ واھگے وان ایت ، وانوک ءِ ہمے ھبّ ءُ ھدوناکی یک نبشتہ کار ے ءِ صوب مندی ءِ مستریں نشان ءُ چیدگ اِنت ۔ تنے وھدی نیاد ءِ ساھگ ءِ نام ءٙ آئی ءِ یک شعرانی کتابے ، موسمے کِسّہانی تہا ءُ شپ پاس ءِ نام ءٙ دو آزمانکانی کتاب ءُ کلیر ءِ نام ءٙ گِدارے چھاپ ءُ شِنگ بیتگ اٙنت ۔ کیھر آئی ءِ نوکتریں گِدار ءِ نام اِنت کہ ہمے زیتاں چہ علم ءُ ادب پبلشرز کراچی ءِ نیمگ ءٙ چھاپ ءُ شِنگ بیتگ ، کتاب ءِ سرتاک صمدعبداللّہ ءٙ جوڈ کتگ ، گالسنج اخترقاضی ءٙ کتگ ءُ پروفانی ردی ڈاکٹرناگمان ، چندن ساچ ءُ کلکشان لبزانکی مجلس ءِ سنگتاں گِپتگ اٙنت ، اے گدار درستی 110، تاکدیم چاگرد کنت ، ءُ نُہہ درانی تہا نبشتہ کنئگ بیتگ ، نامدات ے گدار ءِ نویس ءِ گراں مھزبیں لوگبانک ءِ نام ءٙ اِنت ، گدار ءُ گِدار نویس ءِ بابت ءٙ ماں بنداتی تاکدیماں ناگمان بلوچ ، اے- آر - داد ، اصغر بلوچ ، چندن ساچ ، جمیل مھراب ءُ اختر قاضی ءٙ وتی حیال ءُ لیکہ نبشتہ کتگ اٙنت ۔ Hassa bijaar gidaar " keehur " baam shuben 20, august , 2021 #Hassa-bijjaar #balochifiction

الفئة